سياسة الخصوصية

١. البيانات اللي بنحفظها

• بيانات الشركة: الاسم، واللوجو، واللون، ولينك الشركة.
• المستخدمين: اسم المستخدم، والاسم، والصلاحيات. كلمة السر نفسها مش بنحفظها، بنحفظ منها بصمة متشفرة متقدرش ترجع لكلمة السر، ومحدش عندنا يقدر يعرفها.
• الأجهزة: اسم الجهاز ووقت آخر دخول، علشان تشوف مين داخل وتقدر تطلّع أي جهاز.
• اللي بتسجّله في البرنامج: العملا والموردين وأرقام تليفوناتهم، والفواتير والدفعات والخزنة والمصروفات والأصناف والموظفين والحضور وأي حاجة تانية بتكتبها، ومعاها اسم اللي سجّلها ووقتها.
• الإشعارات: لو شغّلتها، بنحفظ عنوان الإشعار بتاع جهازك علشان نبعتله.

مش بنجمع موقعك، ولا أسماء الموبايل بتاعتك (إلا الرقم اللي انت بتختاره بنفسك لعميل)، ولا أي بيانات من برامج تانية.

٢. فين بتتحفظ

• على جهازك: نسخة متشفرة بكلمة السر بتاعتك، علشان البرنامج يفتح بسرعة ويشتغل من غير نت.
• على السيرفر: على سيرفرات Cloudflare (ممكن تكون برّه مصر)، وكل شركة في مخزن لوحدها، علشان المزامنة بين الأجهزة.
• النسخ الاحتياطية: نسخة أسبوعية متشفرة على Google Drive بتاع مقدّم الخدمة، والنسخ اللي انت بتحفظها بنفسك على جهازك أو فلاشتك.

٣. مين يقدر يشوف بياناتك

• فريقك: كل واحد على قد الصلاحيات اللي صاحب الشركة اداهاله، والمنع ده بيحصل من السيرفر نفسه.
• مقدّم الخدمة: البيانات على السيرفر مش متشفرة بكلمة السر بتاعتك، فمقدّم الخدمة يقدر يوصلّها من الناحية التقنية. مش بنفتحها غير علشان الدعم الفني أو النسخ الاحتياطي أو نقل حساباتك القديمة بطلب منك، أو لو القانون طلب كده.
• نقل الحسابات القديمة: لما تطلبه، بيتعمل حساب باسم "الدعم الفني" جوه شركتك، وبيتقفل أول ما النقل يخلص. الملفات والصور اللي بتبعتها للنقل بنمسحها بعد ما نخلص.
• لينك كشف الحساب: لو بعتّ لعميل لينك كشف حسابه، أي حد معاه اللينك يقدر يشوف الكشف ده بس، لحد 30 يوم أو لحد ما تلغيه.
• شركات بتشغّل الخدمة: Cloudflare للسيرفر، وGoogle للنسخة الأسبوعية، وخدمة الإشعارات بتاعة الموبايل (Google أو Apple)، ونص الإشعار بيوصلها متشفر. ومش بنشارك بياناتك مع أي حد تاني.

٤. الحماية

التخزين على الجهاز متشفر بكلمة السر. والاتصال بالسيرفر كله متشفر. بعد كذا محاولة دخول غلط الدخول بيتقفل شوية. ممكن تفتح بالبصمة، والبرنامج بيتقفل لوحده لو سبته. ومهما عملنا، مفيش نظام على النت متأمن 100%، فخلي كلمة السر قوية ومتديهاش لحد.

٥. حقوقك

• نسخة من بياناتك: تقدر تنزّلها في أي وقت (ملف نسخة احتياطية أو إكسيل)، أو تطلبها مننا.
• التصحيح: أي حاجة متسجلة تقدر تعدّلها من البرنامج، والتعديل بيحفظ القديم في سجل التعديلات.
• المسح: لو طلبت تمسح شركتك، بنمسح بياناتها من السيرفر ومن النسخ الأسبوعية على Drive. والموبايلات اللي عليها البرنامج بتمسحه من عليها لوحدها أول ما تتصل بالنت (لحد 60 يوم بعد المسح). نزّل نسختك قبل ما تطلب المسح، لأن البيانات مبترجعش بعده.

٦. مدة الحفظ

بنحفظ بياناتك طول ما شركتك مشتركة في البرنامج أو بتستخدمه. لو التجربة أو الاشتراك خلص، البيانات بتفضل موجودة تتفرج عليها وتطبعها، لحد ما تطلب المسح أو تتفق معانا على غير كده.

٧. التعديل على السياسة دي

لو غيّرنا حاجة مهمة هنا هنبلّغ صاحب الشركة قبلها، وهنغيّر تاريخ "آخر تحديث" اللي فوق.

٨. التواصل

لأي سؤال أو طلب عن بياناتك، كلّمنا على واتساب الدعم (زرار «كلّم الدعم» جوه البرنامج، أو الرقم اللي في صفحة البيع).